ടൊറണ്ടോ: ഒക്ടോബര്‍ 6ന് വ്യാഴ ഗ്രഹം ചന്ദ്രന് പിന്നില്‍ മറയുന്ന അപൂര്‍വ പ്രതിഭാസം ആകാശനിരീക്ഷകര്‍ക്ക് കാണാനാകും. അമേരിക്കയുടെ കിഴക്കന്‍, മധ്യ മേഖലകളിലും തെക്കന്‍ കാനഡയിലുമാണ് ഈ കാഴ്ച വ്യക്തമായി ദൃശ്യമാകുക. 13 വര്‍ഷത്തിലൊരിക്കല്‍ മാത്രം ലഭിക്കുന്ന ഈ അവസരം ദൂരദര്‍ശിനിയിലൂടെ കൂടുതല്‍ വ്യക്തമായി ആസ്വദിക്കാം.
ആകാശനിരീക്ഷകര്‍ക്ക് അപൂര്‍വ കാഴ്ചയൊരുക്കി ഒക്ടോബര്‍ 6ന് വ്യാഴം ചന്ദ്രന് പിന്നില്‍ മറയും. ചന്ദ്രന്‍റെ പ്രകാശമുള്ള അരികിന് പിന്നിലേക്ക് വ്യാഴം മറയുകയും ഏകദേശം ഒരു മണിക്കൂറിന് ശേഷം ഇരുണ്ട ഭാഗത്തുനിന്ന് വീണ്ടും പ്രത്യക്ഷപ്പെടുകയും ചെയ്യും. അമേരിക്കയുടെ കിഴക്കന്‍, മധ്യ മേഖലകളിലും തെക്കന്‍ കാനഡയിലെ ചില പ്രദേശങ്ങളിലുമാണ് ഈ പ്രതിഭാസം വ്യക്തമായി കാണാനാകുക. പുലര്‍ച്ചെ ഏകദേശം 2:30ഓടെ കിഴക്ക്വടക്കുകിഴക്കന്‍ ആകാശത്ത് ചന്ദ്രനും വ്യാഴവും പ്രത്യക്ഷപ്പെടും. അന്ന് ചന്ദ്രന്‍റെ ഏകദേശം 20 ശതമാനം മാത്രമായിരിക്കും പ്രകാശിതമായിരിക്കുക. ചന്ദ്രന്‍റെ പ്രകാശമുള്ള ഭാഗത്തിന് പിന്നിലേക്ക് വ്യാഴം മറയുന്നത് കാണാന്‍ ദ്വിനേത്ര ദൂരദര്‍ശിനിയോ ദൂരദര്‍ശിനിയോ ഉപയോഗിക്കുന്നത് മികച്ചതാണ്. എന്നാല്‍ ചന്ദ്രന്‍റെ ഇരുണ്ട ഭാഗത്തിന് പിന്നില്‍നിന്ന് വ്യാഴം തിരിച്ചെത്തുന്നത് നഗ്നനേത്രങ്ങള്‍കൊണ്ടും കാണാനാകും. വ്യാഴത്തിന്‍റെ ഉപഗ്രഹങ്ങളും ദൂരദര്‍ശിനിയിലൂടെ ചന്ദ്രന് പിന്നില്‍ മറയുന്നത് കാണാം.
ലോകത്തിന്‍റെ വിവിധ ഭാഗങ്ങളില്‍ 1980നും 2040നും ഇടയില്‍ വ്യാഴത്തെ ചന്ദ്രന് മറയ്ക്കുന്ന 123 സംഭവങ്ങള്‍ ഉണ്ടാകുമെങ്കിലും, ഒരു പ്രത്യേക സ്ഥലത്ത് രാത്രിയിലോ പുലര്‍ച്ചെയോ ഇത് കാണാനുള്ള അവസരം ശരാശരി 13 വര്‍ഷത്തിലൊരിക്കല്‍ മാത്രമാണ് ലഭിക്കുന്നത്. വടക്കേ അമേരിക്കയില്‍ 2004ന് ശേഷമുള്ള ഏറ്റവും ശ്രദ്ധേയമായ വ്യാഴഗ്രഹ മറയലായിരിക്കും ഇത്തവണത്തേത്. ശാസ്ത്രീയ പ്രാധാന്യം പരിമിതമാണെങ്കിലും ആകാശനിരീക്ഷകര്‍ക്ക് അപൂര്‍വവും മനോഹരവുമായ കാഴ്ചയായിരിക്കും ഒക്ടോബര്‍ 6ന് ലഭിക്കുക.
