തിരുവനന്തപുരം: കെ സുധാകരന്‍ കെപിസിസി പ്രസിഡന്‍റായി നാളെ ചുമതല ഏല്‍ക്കും. സുധാകരന്‍റെ കടുത്ത സമ്മര്‍ദത്തിന് പിന്നാലെയാണ് ചുമതല ഏല്‍ക്കാന്‍ ഹൈക്കമാന്‍റ് അനുമതി നല്‍കിയത്. വിവാദം അവസാനിപ്പിക്കാന്‍ എഐസിസി ഇടപെടുകയായിരുന്നു. അതേസമയം, കെപിസിസി പ്രസിഡന്‍റ് സ്ഥാനം തനിക്ക് തരേണ്ട കാര്യമില്ലെന്നും പോയി ഒപ്പിട്ട് എടുക്കാവുന്നതേ ഉള്ളൂ എന്നും കെ സുധാകരന്‍ ഇന്ന് മാധ്യമങ്ങളോട് പ്രതികരിച്ചു. പാര്‍ട്ടിക്കുള്ളില്‍ തനിക്കെതിരെ ഒരു തന്ത്രവും മെനയുന്നില്ല. തനിക്ക് ആരോടും ഒരു പരാതിയും ഇന്നലെന്നും കെ സുധാകരന്‍ പറഞ്ഞു. കഴിഞ്ഞ കെ.പിസിസി യോഗത്തില്‍ തന്നെ സുധാകരന്‍ ചുമതല എടുക്കേണ്ടതായിരുന്നുവെങ്കിലും താല്‍ക്കാലിക ചുമതലയുള്ള പ്രസിഡണ്ട് എം.എം.ഹസന് ചുമതല ഒഴിയാന്‍ തയ്യാറായിരുന്നില്ല. റിസള്‍ട്ട് വരുന്നതുവരെ ഈ നില തുടരട്ടെ എന്ന നിലപാടായിരുന്നു എം.എം.ഹസന്. ഇതിന് പിന്നില്‍ ചില സമ്മര്‍ദ്ദങ്ങളും ഉണ്ടായിരുന്നുവത്രെ. അതേസമയം തനിക്ക് ചുമതല തിരിച്ചുനല്‍കാത്തതില്‍ സുധാകരനും കടുത്ത അമര്‍ഷത്തിലായിരുന്നു. തുടര്‍ന്നാണ് അദ്ദേഹം എഐസിസിക്ക് മുന്നില്‍ പരാതി നല്‍കിയത്. അതേസമയം, മുഖ്യമന്ത്രിയുടെ വിദേശ യാത്രയെ വിമര്‍ശിച്ച് കൊണ്ട് കെ സുധാകരന്‍ രംഗത്തെത്തി. ആലയില്‍ നിന്ന് പശുക്കള്‍ ഇറങ്ങി പോകും പോലെയാണ് മുഖ്യമന്ത്രി കുടുംബവുമായി പോയിരിക്കുന്നതെന്ന് കെ സുധാകരന്‍ വിമര്‍ശിച്ചു. സ്പോണ്‍സര്‍ഷിപ്പ് ആണോ എന്ന് സംശയമുണ്ട്. മുഖ്യമന്ത്രിക്ക് വിദേശത്ത് പോയപ്പോള്‍ സംസ്ഥാനത്തിന്‍റെ ചാര്‍ജ് ആര്‍ക്കെങ്കിലും കൊടുത്തിട്ടുണ്ടോ. ഇടതുപക്ഷത്തിന് ആകെ ഉള്ള മുഖ്യമന്ത്രിയല്ലേ ഇത്. മറ്റ് സംസ്ഥാനങ്ങളില്‍ പ്രചാരണത്തിനു പോകേണ്ടേ. എന്ത് രാഷ്ടീയ ഉത്തരവാദിത്തമാണ് മുഖ്യമന്ത്രിക്ക് ഉള്ളതെന്നും സുധാകരന്‍ ചോദിച്ചു. സംസ്ഥാനത്ത് എല്‍ഡിഎഫ് 20 ല്‍ 20 സീറ്റും തോല്‍ക്കാന്‍ പോകുകയാണ്. അത് കാണാന്‍ സാധിക്കാതെ പോയതാകും മുഖ്യമന്ത്രിയെന്നും കെ സുധാകരന്‍ വിമര്‍ശിച്ചു.
സമ്മര്‍ദ്ദം ഫലം കണ്ടു; കെ.സുധാകരന്‍ നാളെ പ്രസിഡണ്ടായി ചുമതലയേല്‍ക്കും
