തിരുവനന്തപുരം: ബാലാത്സംഗ കേസില് മുന്കൂര് ജാമ്യാപേക്ഷ തള്ളിയതിന് പിന്നാലെ രാഹുല് മാങ്കൂട്ടത്തിലിനെ കോണ്ഗ്രസില് നിന്ന് പുറത്താക്കി. കോണ്ഗ്രസിന്റെ പ്രാഥമിക അംഗത്വത്തില് നിന്നാണ് രാഹുലിനെ പുറത്താക്കിയത്. നിലവില് സസ്പെന്ഷനിലുള്ള രാഹുല് മാങ്കൂട്ടത്തിലിനെ ഉയര്ന്ന പരാതികളുടെയും രജിസ്റ്റര് ചെയ്ത കേസുകളുടെയും അടിസ്ഥാനത്തില് കോണ്ഗ്രസിന്റെ പ്രാഥമിക അംഗത്വത്തില് നിന്നും പുറത്താക്കിയതായി കെപിസിസി പ്രസിഡന്റ് സണ്ണി ജോസഫ് എംഎല്എ അറിയിച്ചു. രാഹുല് എംഎല്എ സ്ഥാനം ഒഴിയുന്നതാണ് നല്ലതെന്നും സണ്ണി ജോസഫ് പ്രതികരിച്ചു. കോണ്ഗ്രസ് മാതൃകാപരമായ തീരുമാനമാണ് വിഷയത്തില് കൈക്കൊണ്ടിരിക്കുന്നത്. ആക്ഷേപം വന്ന സമയത്ത് തന്നെ രാഹുലിനെ യൂത്ത് കോണ്ഗ്രസ് പ്രസിഡന്റ് സ്ഥാനത്തുനിന്ന് നീക്കിയിരുന്നു. എംഎല്എ സ്ഥാനം രാജിവെക്കുന്നതാണ് ഉചിതം. കെപിസിസിക്ക് പരാതി കിട്ടിയ ഉടന് തന്നെ അത് ഡിജിപിക്ക് കൈമാറിയിരുന്നു. നേതാക്കളുമായും കോണ്ഗ്രസ് ഹൈക്കമാന്റുമായും ചര്ച്ച നടത്തി ഒറ്റക്കെട്ടായെടുത്ത തീരുമാനമാണ് ഇതെന്നും കെപിസിസി അധ്യക്ഷന് സണ്ണി ജോസഫ് പറഞ്ഞു. രാഹുല് മാങ്കൂട്ടത്തിലിന്റെ മുന്കൂര് ജാമ്യാപേക്ഷ തിരുവനന്തപുരം ജില്ലാ സെഷന്സ് കോടതി തള്ളിയതിന് പിന്നാലെയാണ് തീരുമാനം. ജാമ്യാപേക്ഷയില് വിശദമായ വാദത്തിനുശേഷമാണ് കോടതി ജാമ്യം തള്ളിയത്. അടച്ചിട്ട കോടതി മുറിയിലാണ് വാദം നടന്നത്. ഇന്നലെ ഒന്നര മണിക്കൂര് നീണ്ട വാദത്തിനുശേഷം ഒരു രേഖ കൂടി ഹാജരാക്കാന് പ്രോസിക്യൂഷനോട് കോടതി ആവശ്യപ്പെട്ടിരുന്നു. തുടര്ന്ന് ഇന്ന് പുതിയ തെളിവടക്കം പരിശോധിച്ചശേഷമാണ് കോടതി വാദം പൂര്ത്തിയാക്കിയത്. രാഹുലിന്റെ അറസ്റ്റ് തടയണമെന്നായിരുന്നു പ്രതിഭാഗത്തിന്റെ പ്രധാന ആവശ്യം. എന്നാല്, പ്രതിഭാഗത്തിന്റെ വാദം തള്ളികൊണ്ടാണിപ്പോള് മുന്കൂര് ജാമ്യം നിഷേധിച്ചത്.മുന്കൂര് ജാമ്യാപേക്ഷയില് ഇരുഭാഗത്തിന്റെയും വാദം ഇന്നലെ നടന്ന. എന്നാല് ഇന്നലെ വാദം പൂര്ത്തിയായില്ല. ഇന്ന് പ്രോസിക്യൂഷന് ഭാഗവും പ്രതിഭാഗവും വീണ്ടും വാദം നടത്തി. വാദം കേട്ടശേഷം 12 മണിക്ക് അസാധാരണമായി കോടതി പിരിഞ്ഞു. എങ്കിലും 1 മണിയോടെ വിധി പറയുമെന്ന പ്രതീക്ഷയില് മാധ്യമങ്ങളെല്ലാം കോടതി പരിസരത്ത് കാത്തുനിന്നെങ്കിലും 2.30 നാണ് കോടതി വിധി പറഞ്ഞത്. ഇന്നലെ അടച്ചിട്ട കോടതിമുറിയില് ഒന്നര മണിക്കൂര് സമയമാണ് വാദം നടന്നത്. ഒരു രേഖ കൂടി ഹാജരാക്കാന് കോടതി ഇന്നലെ ആവശ്യപ്പെട്ടു. ഇന്ന് അത് ഹാജരാക്കി. തുടര്ന്നായിരുന്നു വാദം.
കോണ്ഗ്രസില് നിന്നും പുറത്താക്കി; രാഹുലിന്റെ ജാമ്യഹരജിയും തള്ളി
