തൃശൂര്: ബലാത്സംഗക്കേസില് രാഹുല് മാങ്കൂട്ടത്തില് എംഎല്എയുടെ അറസ്റ്റ് ഹൈക്കോടതി തടഞ്ഞതില് പ്രതികരിച്ച് മുഖ്യമന്ത്രി പിണറായി വിജയന്. കോടതിയുടെ നടപടിക്രമം മാത്രമാണിതെന്നാണ് അദ്ദേഹം പറഞ്ഞത്. ഒളിവില്പ്പോയ രാഹുലിനെ പോലീസിന് കണ്ടെത്താന് സാധിച്ചിട്ടില്ലയെന്ന് പറയുന്നത് ശരിയാണെന്നും മുഖ്യമന്ത്രി വ്യക്തമാക്കി. തൃശൂരില് മീറ്റ് ദി പ്രസ് പരിപാടിയില് സംസാരിക്കുകയായിരുന്നു അദ്ദേഹം. 'കോടതിയില് മുന്കൂര് ജാമ്യാപേക്ഷ നിലനില്ക്കുമ്പോള് അറസ്റ്റ് ചെയ്യുന്നതിന് അതൊരു തടസമല്ല. പക്ഷേ കേരളത്തില് കണ്ടുവരുന്ന രീതി അതിന്റെ തീരുമാനം വരുന്നതുവരെ കാത്തുനില്ക്കലാണ്. ഇപ്പോള് ഹൈക്കോടതിയുടെ മുമ്പില് മുന്കൂര് ജാമ്യത്തിനായി സമീപിച്ചിരിക്കുകയാണ്. അത് ഹൈക്കോടതി സ്വീകരിച്ച് ഒരു തീയതിയിലേക്ക് കേസ് കേള്ക്കുന്നതിനായി വച്ചിരിക്കുകയാണ്. സാധാരണ ഇതാണ് നാട്ടില് കണ്ടുവരുന്ന രീതി. പക്ഷെ ഇവിടെ കോടതി പ്രത്യേകമായി അറസ്റ്റ് നടത്തരുതെന്ന് പറഞ്ഞിരിക്കുകയാണ്. അത് കോടതി നടപടിയുടെ ഭാഗമാണ്. പോലീസിന് രാഹുലിനെ കണ്ടെത്താന് സാധിച്ചിട്ടില്ലയെന്നത് ശരിയാണ്. പക്ഷെ പോലീസ് അറിഞ്ഞുകൊണ്ട് അദ്ദേഹത്തെ അറസ്റ്റ് ചെയ്യാത്തതാണെന്ന് പറയുന്നത് ശരിയായ കാര്യമല്ല. അദ്ദേഹത്തിന് ഒളിവില്പോകാന് ആവശ്യമായ സഹായങ്ങള് ചെയ്തുകൊടുത്തത് സഹപ്രവര്ത്തകരാണല്ലോ. അവര് കോണ്ഗ്രസിന്റെ പ്രവര്ത്തകരും നേതാക്കളുമാണ്. അത് വിവിധ തലത്തിലുള്ളവരാണ്. അതുകൊണ്ടാണ് സംസ്ഥാനത്തിന് പുറത്തടക്കം വലിയ തരത്തിലുള്ള സംരക്ഷണം ഒരുക്കിയത്. അവര്ക്കാണ് രാഹുല് എവിടെയാണെന്ന് അറിയുന്നത്. രാഹുലിന് രക്ഷപ്പെടാനുള്ള രക്ഷാവലയം കോണ്ഗ്രസാണ് ഒരുക്കിയത്. അയാള്ക്ക് പിന്നില് ഇപ്പോഴും നേതൃത്വമുണ്ട്' മുഖ്യമന്ത്രി പറഞ്ഞു.
രാഹുലിന്റെ അറസ്റ്റ് തടഞ്ഞത് സ്വാഭാവിക നടപടി-മുഖ്യമന്ത്രി
