കോഴിക്കോട്: കോഴിക്കോട് ബേബി മെമ്മോറിയല്‍ ആശുപത്രിയില്‍ തീപിടിത്തം. ആശുപത്രിയുടെ സി ബ്ലോക്കിലായി മുകള്‍ നിലയിലാണ് തീപിടിത്തം. എല്ലാവരും സുരക്ഷിതരാണെന്നും ആരും ഇല്ലാത്ത സ്ഥലത്താണ് തീപിടിത്തമുണ്ടായതെന്നും അധികൃതര്‍ അറിയിച്ചു. വന്‍തോതില്‍ പുക ഉയര്‍ന്നത് പരിഭ്രാന്തിക്കിടയാക്കിയെങ്കിലും, കൃത്യമായ ഇടപെടലുകള്‍ വഴി വന്‍ ദുരന്തം ഒഴിവായി. തീപിടിത്തമുണ്ടായ കെട്ടിടത്തിന്‍റെ മുകള്‍നിലയില്‍ നിന്നും സമീപത്തെ കോച്ചുകളിലേക്കും പുക വ്യാപിച്ചു. ഉടന്‍ തന്നെ ആശുപത്രി അധികൃതര്‍ അറിയിച്ചതനുസരിച്ച് ഫയര്‍ ഫോഴ്സിന്‍റെ മൂന്ന് യൂണിറ്റുകള്‍ സ്ഥലത്തെത്തി. മണിക്കൂറുകളോളം നടത്തിയ പരിശ്രമത്തിനൊടുവില്‍ അഗ്നിശമന സേന തീയണച്ചു. തീപിടിത്തം നടന്ന ഭാഗം രോഗികളെ പ്രവേശിപ്പിക്കാത്ത എയര്‍ കണ്ടീഷണര്‍ (എസി) പ്ലാന്‍റ് സ്ഥിതി ചെയ്യുന്ന സ്ഥലമാണെന്ന് ആശുപത്രി അധികൃതര്‍ സ്ഥിരീകരിച്ചു. അതിനാല്‍ രോഗികളെയോ ജീവനക്കാരെയോ അപകടം ബാധിച്ചിട്ടില്ല. സംഭവസമയത്ത് ആശുപത്രിയില്‍ ഉണ്ടായിരുന്ന രോഗികളെയും കൂട്ടിരിപ്പുകാരെയും സുരക്ഷിതമായി മറ്റ് ബ്ലോക്കുകളിലേക്ക് മാറ്റി. ഷോര്‍ട്ട് സര്‍ക്യൂട്ടാണ് തീപിടിത്തത്തിന് പിന്നിലെന്നാണ് പ്രാഥമിക നിഗമനം. സംഭവത്തെക്കുറിച്ച് കൂടുതല്‍ അന്വേഷണം ആരംഭിച്ചിട്ടുണ്ട്.
കോഴിക്കോട് ബേബി മെമ്മേറിയല്‍ ആശുപത്രിയില്‍ തീപിടുത്തം
