തിരുവനന്തപുരം: യുഡിഎഫ് സര്ക്കാര് അധികാരത്തില്‍ വന്ന ശേഷം എക്സൈസ് മന്ത്രി അറിയാതെ എക്സൈസ് കമ്മീഷണര്‍ സാംബശിവ റാവു ബാറുകള്‍ അനുവദിച്ചു. എറണാകുളം, കോട്ടയം ജില്ലകളില്‍ പുതിയ ബാര്‍ ലൈസന്‍സുകള്‍ അനുവദിച്ചതുമായി ബന്ധപ്പെട്ട വിവാദത്തില്‍ എക്സൈസ് കമ്മീഷണറോട് വകുപ്പ് മന്ത്രി എം. ലിജു വിശദീകരണം ആവശ്യപ്പെട്ടു. കഴിഞ്ഞ ജൂണില്‍ രഹസ്യമായി നല്‍കിയ മൂന്ന് ബാര്‍ ലൈസന്‍സുകളുടെ ഫയലുകളും അപേക്ഷാ നടപടികളുമാണ് സര്ക്കാര് ഇപ്പോള്‍ പരിശോധിക്കുന്നത്. മദ്യനയത്തില്‍ അന്തിമ തീരുമാനം വരുന്നതുവരെ പുതിയ ബാര്‍ ലൈസന്‍സുകള്‍ നല്‍കരുതെന്ന കര്‍ശന നിര്‍ദ്ദേശം എക്സൈസ് കമ്മീഷണര്‍ ലംഘിച്ചെന്നാണ് ഉയരുന്ന പ്രധാന ആരോപണം. വിമാനത്താവളത്തിലെ ബാര്‍ ലൈസന്‍സ് ഉള്‍പ്പെടെയുള്ള വിവരങ്ങള്‍ സര്‍ക്കാരിന്‍റെ അറിവോടെയല്ല നടപ്പിലാക്കിയതെന്നും, ഇത് മറച്ചുവെക്കാന്‍ കമ്മീഷണര്‍ ബോധപൂര്‍വ്വമായ ഇടപെടല്‍ നടത്തിയെന്നുമാണ് വിലയിരുത്തല്‍.
വിശദീകരണം തേടി സര്ക്കാര് നല്‍കിയ കത്തിന് പിന്നാലെയാണ് വകുപ്പ് തല അന്വേഷണവും വരുന്നത്. നിലവിലെ അബ്കാരി ചട്ടങ്ങള്‍ പ്രകാരം, ദീര്‍ഘകാലമായി ബിയര്‍ പാര്‍ലറുകളായി പ്രവര്‍ത്തിക്കുന്ന സ്ഥാപനങ്ങള്‍ക്ക് നിബന്ധനകളില്ലാതെ ബാര്‍ ലൈസന്‍സിലേക്ക് മാറാന്‍ അനുവാദം നല്‍കാന്‍ ഡെപ്യൂട്ടി കമ്മീഷണര്‍ക്ക് അധികാരമുണ്ട്. എന്നാല്‍ സര്‍ക്കാരിന്‍റെ നയം നിലനില്‍ക്കെ, യാതൊരുവിധ പരിശോധനകളും നടത്താതെ വെറും 24 മണിക്കൂറിനുള്ളില്‍ ലൈസന്‍സുകള്‍ നല്‍കിയതാണ് വിവാദത്തിന് തിരികൊളുത്തിയത്. അസിസ്റ്റന്‍റ് ചീഫ് സെക്രട്ടറി സര്‍ക്കാരിന്‍റെ നയം വ്യക്തമാക്കിയിട്ടും സമാനമായ രീതിയില്‍ മറ്റ് ലൈസന്‍സുകള്‍ നല്‍കിയിട്ടുണ്ടോ എന്നും ഉദ്യോഗസ്ഥര്‍ പരിശോധിക്കുന്നുണ്ട്. എക്സൈസ് കമ്മീഷണറുടെയും ഡെപ്യൂട്ടി കമ്മീഷണര്‍മാരുടെയും ലൈസന്‍സ് വിതരണാധികാരവുമായി ബന്ധപ്പെട്ട നിയമ പഴുതുകള്‍ ചൂഷണം ചെയ്യുന്നത് തടയാന്‍ അബ്കാരി ചട്ടങ്ങള്‍ ഭേദഗതി ചെയ്യാന്‍ സര്ക്കാര് ആലോചിക്കുന്നുണ്ട്. കമ്മീഷണര്‍ നല്‍കുന്ന റിപ്പോര്‍ട്ടിന്‍റെ അടിസ്ഥാനത്തില്‍ അദ്ദേഹത്തെ തല്‍സ്ഥാനത്തുനിന്ന് മാറ്റുന്നത് ഉള്‍പ്പെടെയുള്ള കടുത്ത അച്ചടക്ക നടപടികളിലേക്ക് സര്ക്കാര് കടക്കുമെന്നാണ് സൂചന.
സംസ്ഥാനത്ത് പുതിയ ബാറുകള്‍ക്ക് ലൈസന്‍സ് അനുവദിച്ച സംഭവത്തില്‍ വിശദീകരണം നല്‍കി എക്സൈസ് കമ്മീഷണര്‍ സാംബശിവ റാവു. ജൂണ്‍മാസത്തില്‍ അനുവദിച്ച ലൈസന്‍സുകള്‍ പൊതുജനങ്ങള്‍ ദിവസേന ഉപയോഗിക്കുന്ന ബാറുകള്‍ക്കല്ലെന്നും സര്ക്കാര് സ്ഥാപനമായ സിയാലിന്‍റെ അപേക്ഷ പ്രകാരമാണ് ലോഞ്ചില്‍ ലൈസന്‍സ് നല്‍കിയതെന്നും സാംബശിവറാവു പറഞ്ഞു. മറ്റൊരു ബാര്‍ ലൈസന്‍സ് അപേക്ഷ ജൂണ്‍മാസത്തില്‍ സര്‍ക്കാരിന് കൈമാറി. ഓഗസ്റ്റ് മാസത്തിലെ സര്ക്കാര് മറുപടിക്കു ശേഷം ലൈസന്‍സ് അനുവദിച്ചിട്ടില്ലെന്ന് കമ്മീഷണര്‍ വ്യക്തമാക്കി.
