നീലേശ്വരം: പരാതി പറയാനുണ്ടെന്ന് പറഞ്ഞ് നീലേശ്വരം പോലീസ് സ്റ്റേഷനിലെത്തിയ എസ്.ഐ.യെയും പോലീസുകാരനെയും ആക്രമിച്ച കേസിലെ പ്രതി അറസ്റ്റില്‍. ചായ്യോത്ത്, മാനൂരിയിലെ കിഴക്കേവീട്ടില്‍ കെ.വി സന്തോഷി (40)നെയാണ് പോലീസുകാര്‍ ബലപ്രയോഗത്തിലൂടെ കീഴടക്കിയത്. ഇന്നലെ രാത്രി ഏഴര മണിയോടെയാണ് സംഭവം. പരാതി നല്‍കാനുണ്ടെന്ന് പറഞ്ഞാണ് സന്തോഷ് പോലീസ് സ്റ്റേഷനില്‍ എത്തിയത്. പരാതി എഴുതി നല്‍കാന്‍ പി.ആര്‍.ഒ ഡ്യൂട്ടിയിലുണ്ടായിരുന്ന എ.എസ്.ഐ പ്രകാശന്‍ ആവശ്യപ്പെട്ടു. എന്നാല്‍ മദ്യലഹരിയിലായിരുന്ന സന്തോഷ് പരാതി എഴുതി നല്‍കാന്‍ തയ്യാറാകാതെ പി.ആര്‍.ഒ ഓഫീസ് മുറിയിലെ കസേരയും മറ്റും വലിച്ചെറിയുകയായിരുന്നുവെന്ന് കേസില്‍ പറയുന്നു. ബഹളം കേട്ട് ഓടിയെത്തിയ എസ്.ഐ അരുണ്‍ മോഹന്‍റെ കോളറില്‍ പ്രതി പിടിക്കുകയും യൂണിഫോമിലെ നെയിംപ്ലേറ്റ് പിടിച്ചുപറിച്ച് കയ്യേറ്റം ചെയ്യുകയും ചെയ്തു. തടയാന്‍ ചെന്നപ്പോഴാണ് സിവില്‍ പോലീസ് ഓഫീസര്‍ നിതീഷിനെ ആക്രമിച്ചത്. സ്റ്റേഷനില്‍ ഉണ്ടായിരുന്ന മറ്റു പോലീസുകാര്‍ ബലം പ്രയോഗിച്ചാണ് സന്തോഷിനെ കീഴടക്കിയത്. പരിക്കേറ്റ പോലീസുകാര്‍ നീലേശ്വരം താലൂക്കാശുപത്രിയില്‍ ചികിത്സ തേടി.
സ്റ്റേഷനില്‍ കയറി പോലീസിനെ അക്രമിച്ച പ്രതി അറസ്ററില്
