നിലേശ്വരം : കാഞ്ഞങ്ങാട് ഡി വൈ എസ് പി, ബാബു പെരിങ്ങേത്തിന്‍റെ നേതൃത്വത്തില്‍ നീലേശ്വരം പോലീസിന്‍റെ സഹകരണത്തോടുകൂടി എക്സൈസും ചേര്‍ന്ന് മൂന്നു കേന്ദ്രങ്ങളിലായി നടത്തിയ പരിശോധനയില്‍ നീലേശ്വരത്ത് വന്‍ തോതില്‍ ലഹരി വസ്തുക്കളുടെ ശേഖരം കണ്ടെത്തി.
പുത്തരിയടുക്കം, മൂന്ന് റോഡ്, ചായ്യോത്ത് എന്നിവിടങ്ങളില്‍ അതിഥി തൊഴിലാളികളുടെ താമസ കേന്ദ്രങ്ങളിലായിരുന്നു റെയ്ഡ്. പുത്തരിയടുക്കത്ത് നടത്തിയ പരിശോധനയില്‍ നിരോധിത പുകയില ഉല്‍പന്നങ്ങളുടെ വന്‍ശേഖരമാണ് കണ്ടെത്തിയത്. 900 ലധികം പായ്ക്കറ്റ് പുകയില ഉത്പന്നങ്ങള്‍ ഇവിടെ കണ്ടെത്തി. പ്ലൈവുഡ് കമ്പനിയില്‍ ജോലി ചെയ്യുന്ന അതിഥി തൊഴിലാളികളുടെ താമസസ്ഥലത്താണ് ഇവ കണ്ടെത്തിയത്. ഡി വൈ എസ് പിക്ക് പുറമേ നീലേശ്വരം എസ്.ഐമാരായ അരുണ്‍മോഹന്‍, കെ.വി.രതീശന്‍, പ്രദീപ്, സ്പെഷ്യല്‍ ബ്രാഞ്ച് എസ്.ഐ എം.മഹേന്ദ്രന്‍, എക്സൈസ് ഇന്‍സ്പെക്ടര്‍മാരായ പ്രസന്നകുമാര്‍, വി.ബാബു എന്നിവരുടെ നേതൃത്വത്തിലായിരുന്നു മിന്നല്‍ പരിശോധന. സംഭവത്തില്‍ ആസാം സ്വദേശിയായ ജിയാദുള്‍ ഇസ്ലാമിനെ (26) പോലീസ് അറസ്റ്റ് ചെയ്തു. ഡിവൈഎസ്പിക്ക് കിട്ടിയ രഹസ്യ വിവരത്തിന്‍റെ അടിസ്ഥാനത്തിലായിരുന്നു മിന്നല്‍ പരിശോധന. ഇത്തരം കേന്ദ്രങ്ങളില്‍ തുടര്‍ന്നും പരിശോധനകള്‍ തുടരുമെന്ന് പോലീസ് അറിയിച്ചു.
