നീലേശ്വരം: നീലേശ്വരത്ത് ജനങ്ങളുടെ ദുരിതത്തിലാക്കി രാജാറോഡ് ലിങ്ക് റോഡ് നിര്മ്മാണം പുനരാരംഭിച്ചു. മാസങ്ങള്ക്ക് മുമ്പേ നിര്മ്മാണം തുടങ്ങി പാതിവഴിക്ക് നിര്ത്തിവെച്ച ലിങ്ക് റോഡ് പ്രവര്ത്തിയാണ് വീണ്ടും ആരംഭിച്ചത്. കനത്ത മഴയെ തുടര്ന്നാണ് റോഡ് നവീകരണം പാതിവഴിയില് നിര്ത്തിവെച്ചത്. എന്നാല് മഴമാറി ആഴ്ചകള് കഴിഞ്ഞിട്ടും നിര്മ്മാണം പുനരാരംഭിച്ചില്ല. നീലേശ്വരത്ത് നഗര ഹൃദയത്തിലൂടെ കടന്നുപോകുന്ന നീലേശ്വരം രാജാറോഡുമായി ബന്ധിപ്പിക്കുന്ന നീലേശ്വരം ബസാര് തളിയില് അമ്പലം റോഡ്, ശ്രീവത്സം തെരുറോഡ്, നീലേശ്വരം വില്ലേജ് ഓഫീസ് തളിയില് അമ്പലം റോഡ്, ശ്രീവത്സവം രാജാറോഡ് ലിങ്ക് റോഡ്, ചിറ കരിഞ്ചാത്തം വയല് റോഡ്, എന്നീ അഞ്ച് മുനിസിപ്പല് റോഡുകളെ പരസ്പരം ബന്ധിപ്പിച്ച് 1.5 കിലോമീറ്റര് ദൂരത്തില് 3.80 മീറ്റര് മുതല് 7 മീറ്റര് വീതി വരെ ബി.എം ആന്റ് ബി.സി ചെയ്തു ആധുനികവല്ക്കരിക്കുന്ന പദ്ധതിയാണ് ഇപ്പോള് വീണ്ടും നിര്മ്മാണം തുടങ്ങിയത്. മെയിന്ബസാര്- ശ്രീവത്സം-ദേശീയപാതാ റോഡിന്റെ ആദ്യഘട്ട ടാറിങ്ങ് നേരത്തെ പൂര്ത്തീകരിച്ചിരുന്നു. മറ്റു റോഡുകള് ഭാഗീകമായി മെറ്റല് നിരത്തി ഉറപ്പിച്ചിരുന്നു. ഇതിന്റെ ടാറിങ്ങാണ് ബാക്കി കിടന്നത്. തെരുവു റോഡിന് രണ്ട് ഭാഗത്തും, മറ്റ് റോഡുകളില് ഒരു ഭാഗത്തും ഡ്രെയിനേജ് സിസ്റ്റം, കവറിംഗ് സ്ലാബ്, കല്വട്ട്, ഇന്റര്ലോക്ക് നടപ്പാത, ഹാന്ഡ് റയില് എന്നിവയോടൊപ്പം സുരക്ഷാ സംവിധാനങ്ങളായ സെന്റര് ലൈന്, സ്റ്റഡ്, സൂചന ബോര്ഡുകള് എന്നിവയും പൂര്ത്തിയാക്കാനുണ്ട്. എം.രാജഗോപാലന് എംഎല്എയുടെ ശ്രമഫലമായാണ് അഞ്ചുകോടി രൂപയുടെ ലിങ്ക് റോഡ് നവീകരണത്തിന് അനുമതി ലഭിച്ചത്.
ആശ്വാസമായി; നീലേശ്വരം ലിങ്ക് റോഡ് നിര്മ്മാണം തുടങ്ങി
