പയ്യന്നൂര്‍: അധ്യാപകന്‍, സാംസ്കാരിക പ്രഭാഷകന്‍, സാഹിത്യനിരൂപകന്‍, നാടകപ്രവര്‍ത്തകന്‍, കലാസ്വാദകന്‍ എന്നീ നിലകളില്‍ ഉത്തരകേരളത്തിലെ അറിയപ്പെട്ട പി.അപ്പുക്കുട്ടന്‍ മാസ്റ്റര്‍ (85) അന്തരിച്ചു. ഇന്ന് രാവിലെ പയ്യന്നൂര്‍ സഹകരണ ആസ്പത്രിയിലായിരുന്നു അന്ത്യം. പുരോഗമന കലാസാഹിത്യ സംഘത്തിന്‍റെ സംസ്ഥാന ജനറല്‍ സെക്രട്ടറിയായും സംസ്ഥാന വൈസ് പ്രസിഡന്‍റായും പ്രവര്‍ത്തിച്ചു. കേരള സാഹിത്യ അക്കാദമി, സംഗീത നാടക അക്കാദമി എന്നിവയിലും അംഗമായിരുന്നു. 1996 മുതല്‍ അഞ്ചു കൊല്ലം കേരള സംഗീത നാടക അക്കാദമി സെക്രട്ടറിയായും പ്രവര്‍ത്തിച്ചു. 1939 ആഗസ്റ്റ് 10 ന് അന്നൂരിലെ കരിപ്പത്ത് കണ്ണപൊതുവാളുടെയും എ.പി.പാര്‍വതി അമ്മയുടെയും മകനായി ജനിച്ചു. അന്നൂര്‍ യു.പി. സ്കൂള്‍, പയ്യന്നൂര്‍ ഗവ. ബോയ്സ് ഹൈസ്കൂള്‍, കണ്ണൂര്‍ ഗവ. ട്രെയിനിങ് സ്കൂള്‍ എന്നിവിടങ്ങളില്‍ പഠനം പൂര്‍ത്തിയാക്കി. എസ്.എസ്.എല്‍. സി.ക്ക് ശേഷം കണ്ണൂര്‍ ഗവ. ട്രെയിനിംഗ് സ്കൂളില്‍ നിന്ന് അധ്യാപക പരിശീലനം നേടി. 1959 ല്‍ വെള്ളോറ യു.പി. സ്കൂളില്‍ അധ്യാപകനായി. 1962ല്‍ പി.എസ്.സി. നിയമനം ലഭിച്ച് ഗവ. ഹൈസ്കൂളിലെത്തി. വിദ്വാന്‍ പരീക്ഷ പാസായതിനെത്തുടര്‍ന്ന് ഹൈസ്കൂള്‍ അധ്യാപകനായി പ്രമോഷന്‍ ലഭിക്കുകയും കാസര്‍ക്കോട് ഗവ. ഹൈസ്കൂളില്‍ ഭാഷാധ്യാപകനായി നിയമനം ലഭിച്ചു. 1995 മാര്‍ച്ചില്‍ പയ്യന്നൂര്‍ ഗവ. ബോയ്സ് ഹൈസ്കൂളില്‍നിന്ന് വിരമിച്ചു. പുസ്തകങ്ങള്‍ : അക്ഷഹൃദയം., പി അപ്പുക്കുട്ടന്‍റെ തെരഞ്ഞെടുത്ത പ്രബന്ധങ്ങള്‍.
ഭാര്യ: പരേതയായ സി.പി. വത്സല. മക്കള്‍: സി.പി.സരിത, സി.പി. ശ്രീഹര്‍ഷന്‍ (ചീഫ് കറസ്പോണ്ടന്‍റ്, മാതൃഭൂമി ഡല്‍ഹി), സി.പി.പ്രിയദര്‍ശന്‍ (ഗള്‍ഫ്). മരുമക്കള്‍: ചിത്തരഞ്ജന്‍ (മാനേജര്‍,കേരള ഗ്രാമീണ ബേങ്ക്, കുടിയാന്‍ മല), സംഗീത (അസി.പ്രൊഫസര്‍ ഐഐഎം.ഇന്‍ഡോര്‍), ഹണി (ദുബായ് ), മൂരിക്കൊവ്വല്‍ പൊതു ശ്മശാനത്തില്‍ മൃതദേഹം സംസ്ക്കരിച്ചു.
